القصة عن مجموعة بنات في مدينة الرياض بصف ثاني ثانوي , يحبون بعض وتجمعهم صداقة قوية ولا يمكن يتفرقون في يوم من الايام , بكوا مع بعض وضحكوا مع بعض واستهبلوا مع بعض وتعاونوا وقت الشدايد ودووم اعز الصديقات
و تبدأ قصتنا معاهم في اول ايام الاختبارات والبنات صارلهم اسبوعين ماشافوا بعض ومتحمسين للروحة للمدرسة << اول مرة خخ
خلوني اعرفكم بالشخصيات :
دانة : بنت مافي جمالها احد , شعرها اسود يوصل لنصف لأكتافها , بيضا وعيونها حلوة وشفايفها وردية جسمها مخصر رشيقة وطولها متوسط وفيها من الطفولة شوي وكلها رقة وانوثة , بس في وقت الشدايد تكون قوية وبوقت الهبال مافيه احد مرجوج مثلها ههههه
العنود : هذي ابد مالها في الدراسة وهي اكثر وحدة مرجوجة بالشلة وما تشوفونها ساكتة ابداً , طول الوقت تضحك وتستهبل , جريئة بشكل بس حلوة وفيها انوثة مع ان شعرها بوي وتصرفاتها عربجية , العنود بنت عم دانة وقريبة منها .
ريم : اقرب وحدة للعنود وتحاول تصير مثلها عربجية بس اوقات لما تكون على طبيعتها تكون دلوعة وهادية , ابوها صديق ابو العنود وقريب منه مرة ,, ولهالسبب ريم دايما في بيت العنود وتعتبر ابو العنود عمها ومثل ابوها
طيف : مملوحة قصيرة شوي وجسمها مليان بيضا وتحب الدراسة والمذاكرة بشكل مو طبيعي , يعني دافورة الفصل , شعرها يوصل لآخر ظهرها لأنها تحب الشعر الطويل , وماشاء الله ناعم , مع ان طيف اشطر بنات الفصل بس وقت تكون مع صديقاتها تستهبل معهم وتضحك وتنسى الدراسة وهمها .
أمل : هااااادية وما تسمعون صوتها الا نادرا , خجولة وتستحي من كل شي , حلوة ودلوعة وأطول وحدة من الشلة وانحفهم بعد , سمرا شوي وتحب الدباديب والعرايس ووغرفتها مليانة الوان وصور اطفال .
.
&&&&&&&&&&&&&&&&&&&&&&&&&&&&&&&&&&&&&&&&&&&
اخيرا بدت المدرسة والبنات متحمسين يشوفون بعض , اول ما دخلت دانة للمدرسة شافت أمل والعنود وريم وراحت تركض لهم وضمتهم بكل قوتها .
دانة : وحشتوني بنات من زمان عنكم
أمل : والله وحنا اكثر حبيبتي تونا نقول وين دانة تأخرت
ريم : الا كيفك وكيف المذاكرة امس ؟
دانة : والله شفت فلم حلو البارح وما قدرت امسك نفسي وتركت المذاكرة وتابعته
ريم : هههههههه يعني بتروحين فيها اليوم ؟
دانة بيأس : ههههه شكلي
أمل : اقول خلنا من المذاكرة والدراسة وهمها ,, ما وحشتكم في هالاسبوعين ؟
ريم والعنود ودانة بصوت واحد : لااااااا
ريم : اصلا زين افتكينا منك اسبوعين كاملة
دانة : يا ربي لك الحمد والشكر .
العنود نطت تستهبل : اما انا اسبوعين ارتحت منكم ,, والله ما تقصر المدرسة .
البنات ضحكوا كلهم : هههههههههههههههههههههههههههههههههه
وفجأة دخلت طيف من باب المدرسة ويدينها مليانة اوراق وكتب ودفاتر واقلام وملفات ,, وقبل حتى ما تسلم على البنات على طول تكلمت من القلق : يووووه يا بنات متوترة وخايفة من الاختبار وربي خايفة آخذ نسبة مو زينة خاصة ان ثاني ثانوي فيها مستقبل وحاسة بضغط كبير امس كله ما نمته ....
قاطعتها العنود : والله انا بخير الحمد لله حتى انا اشتقتلك .
ضحكت طيف : هههههه الله يقلع سوالفك , نسيت اسلم عليكم بس اعذروني خاااايفة ومتوترة
دانة : طبيعي طبيعي يا قلبي شي عادي تتوترين المهم طمنينا كيفك في الاسبوعين اللي راحوا ؟
طيف : انا تمام الحمد لله بس غرفتي ملياااانة اوراق ما ادري من وين ابدأ في مادة بكرة ,, اوووف الفيزياء صعبة مرة وانا محتارة في ....
قاطعتها ريم تستهبل : لحظة لحظة ماسكة خط شكلك ؟
ضحكوا البنات كلهم وسلموا على طيف وضموها وبدوا سوالف وضحك واستهبال ووناسة وفلة
طيف : بنات خلاص اسمحولي انا بروح عن ازعاجكم عشان اذاكر تدرون باقي نصف ساعة على الاختبار
العنود : عادي عادي متعودين كل سنة تروحين وتتركينا .
طيف وهي تضحك : العنود بلا سخافة هذا مستقبل مو لعبة
ريم : مو مشكلة حبيبتي روحي الله يسهل عليك الاختبار وتطلعين منه وانتي تضحكين على نفسك وتقولين وشلون ضغطت على نفسي والاختبار سهل لهالدرجة
البنات لكهم بصوت واحد : آآآآآآمين
طيف : ربي لا يحرمني منكم ,, بـ بسـ بس عندي طلب .
ريم : آمري
طيف : ابغا وحدة منكم تروح تجلس معاي ما ابي اجلس لحالي .
ريم : طيف اعذريني ما اتحمل منظر الكتب والاوراق اللي معك .
طيف : بليييييييييييييييييز
ريم : طيف قلتلك ما اقدر لا تحاولين
طيف : ادري العنود مافيه امل تجين معي علشان كذا بسأل دندونة بعد قلبي .
العنود : زين انك عارفة لأني لو تسوين المستحيل ما رحت معك.
طيف : الله لا يحدني واحتاجك بيوم من الايام .
دانة : معليش تايم آوت ,, مين قالك اني راح اوافق ؟
طيف : دودو بليييييز مافيه غيرك لا تخيبين ظني .
دانة اشفقت على طيف : امممممم طيب مشينا .
وراحوا دانة وطيف بعيد وجلست طيف تذاكر ودانة تطالع بالبنات وتفكر واحيانا تذاكر مع طيف شوي .. وبعدها بربع ساعة ..
طيف : دانة ممكن طلب ؟
دانة بملل وقلة صبر : آمري
طيف : بغيتك تجيبين لي موية
دانة : نعم نعم نعم ؟؟؟!!!
طيف : بليز دندونة طلبتك لا ترديني تعرفين الضغط اللي يجيني في اول يوم من الاختبارات ومحتاجة موية بلييييز
دانة وطيف فقعت راسها : خلاص خلاص بس اسكتي
طيف : يعني بتجيبينلي ؟
دانة : بشرط .. المرة الجاية انتي تشترينلي
طيف : من عيوني اشتريلك موية وعصير بعد
دانة : وتويكس
طيف وهي تضحك : هههههههههه وتويكس بعد ,, ها شقلتي ؟
دانة : ثواني والموية تكون عندك .
طيف : تسلمين يا بعدهم
راحت دانة للمقصف ولقت زحمة كبيييرة وقررت تنتظر لما تخف الزحمة وتروح تشتري , وهناك شافت رغد قالت بروح اسلم عليها .
رغد : زميلة دانة والشلة في الفصل بس مو صديقتهم لأن لها صديقاتها وشلتها الخاصة , بس هم كلهم عربجيات ويستغلون رغد وما يحبونها بس رغد ما حست بهالشي ,, رغد حلوة وشكلها مرة كيوت والكل يمدح فيها , طويلة و بيضا وشعرها قصير عند رقبتها لونه اسود وصابغته خصل حمرا , تحب دايما تلبس اكسسوارات وتحط ميك اب , فيها انوثة ونعومة وخفيفة دم بشكل كبير .
دانة : هلا وغلا برغودة كيفك ؟
رغد التفتت على دانة وفرحت لما شاتفها وضمتها بقوووة : دانة !!! لك وحشة يا قلبي .
دانة : وانتي اكثر وربي .. ما قلتيلي اخبارك كيفك ؟
رغد : الحمد لله ولو ان الاختبارات مسوية توتر وضغط بس ماشي الحال .
دانة : اما انا عادي لا ضغط ولا هم يحزنون .
رغد تضحك : ههههه يا حليلك ,, الا كيف الشلة ؟ العنود وأمل وطيف وريم ؟
دانة : الحمد لله بخير ويسلمون عليك .
رغد : الله يسلمهم .
دانة : كلهم تقريبا بخير ماعدا طيف , مرررة متوترة وخايفة من الاختبار .
رغد : هههههه اذكر طيف كل سنة تسوي هالحالة الهستيرية قبل الاختبار .
تذكروا رغد ودانة شكل طيف وجلسوا يضحكون عليها .
دانة : الا كيف شلتكم سارة وسمر وتغريد ؟
رغد تنهدت : آآآآه بخير
دانة : رغد انتي متضايقة شي ؟
رغد : بصراحة لو قلتلك انهم ولا مرة من يوم صادقتهم ما اتصولوا علي ولا سألوا عني بتصدقين ؟
دانة : مو معقولة
رغد : الا معقولة , ولا مرة حسيت اني فعلا صدقتهم ولا احس انهم يعتبروني وحدة منهم .
دانة تحمست : صراحة انتي ابدا مو مثلهم لأنهم كلهم عربجيات ومنبوذات والمفروض ما تصادقينهم .
سكتوا شوي وحست رغد ان دانة تمادت في كلامها .
رغد تحاول تلطف الجو : عاد وش نسوي اذا صادقتي احد وحبيتيه وتعلقتي فيه صعب تنسينه .
دانة حست انها غلطت وتعدت على خصوصية رغد : اكيد ,, يوووه نسيت طيف المسكينة شكلها ميتة عطش الحين , وعدتها اشتريلها موية وخذتنا السوالف .
رغد : هههههههه مسكينة ,, انا رايحة اشتري من المقصف تبغيني اشتريلها معي ؟
دانة : والله يا ليت .
رغد تضحك : ههههههه اوكي .
بعدها بخمس دقايق رجعت رغد وعطت دانة الموية .
دانة : مشكورة قلبي تعبناك معانا .
رغد : شدعوة تعبكم راحة .
دانة : تسلمين حبيبتي .
رغد : يلا عن اذنك دانة الشلة ينادوني .
دانة : مو مشكلة باااي
رغد : بااااااااااااااااااااي
راحت رغد لشلتها سمر وسارة وتغريد
رغد بفرح : هلا وغلا بنات اشتقتلكم .
سمر ابتسمتلها ابتسامة خفيفة
تغريد انتبهت للعصير اللي بيد رغد : وليش رحتي للمقصف ولا قلتيلنا ؟
رغد ارتبكت : ها ..... انا ..... ما شفتكم
سارة : والحين شفتينا يلا روحي اشتريلي عصير انا عطشانة
تغريد : اشتريلنا انا وسمر بعد .
رغد : تامرون امر ,, خمس دقايق والعصاير عندكم .
سمر : مشكورة .
سارة : تسلمين بس بسرعة لأني أبغاك تسويلي اشغال ثانية لا تتأخرين .
تغريد تطالع في رغد وهي رايحة : انا ما ادري ليش متحميلنها
سارة : لا تحميلها حنا محتاجين احد يخدمنا في فترة الاختبارات
ضحكوا كلهم على رغد والمسكينة رايحة للمقصف تشتريلهم
موضوع: رواية حبك لون حياتي جنان 
الإثنين أكتوبر 13, 2008 8:00 pm